كتب وليد محمد بالفيس بوك
بصراحه بقي كده ومن غير مجامله الوضع مش مستتب خالص واتخنقنا وجبنا اخرنا,مهو الي بيحصل ده مش لذيذ ,اكمننا يعني سكتنلكوا كتير تعملوا فينا كده,طب احنا ومغلوبين علي امرنا ومتكحرتين و ومتمرمطين انتوا بقي حسوا بينا شويه,عشان الدنيا تمشي وتبقي موز موز موز و ونخشها بقي بدل ما انتوا واقفين وسادين الطريق وسعوا شويه ربنا يوسعها عليكممثال لشاب من جيلنا المسلوخ :
عمي انا عايز اطلب ايد بنتك المحروسه بس ممكن اطلب ايدها من غير ما تطلع انت عيني؟
انا عارف الكلام اللي حتقوله,حتقولي بقي انا لازم اطمن علي بنتي الوحيده ومستقبلها وحياتها وسلاطتها وبابا غنوجها والكلام الفاميلي سايز ده اللي حافظه زي اسمي
استني يا عمي سبني بس اخلص البوقين الي جوايا عشان تعبت والضغط بقي في العلالي,هو مستقبل المحروسه بنت حضرتك مش حيبقي كويس غير بالكاشات والرصيد البنكي المبطرخ,مهو فيه ناس متجوزين وغلبانين بس عايشين زي الفل والحياة موز موز موز,واهو زي ما بيقولوا محدش بينام من غير عشا
يعني مش لازم اجيب شقة مش اقل من 120 متر وفي دور تحتاني عشان حماتي عندها خشونه في المفاصل ومش حتقدر تطلع السلم, ومش لازم اجيب شبكة معتبرة عشان الجيران والقرايب يعرفوا انكوا وقعتوا علي عريس سقع وشاب من الاخر,ومش لازم شبكتها تكون زي شبكة بنت خالتها ازاي عشان النس متكلش وشكوا ,مش لازم نعمل الفرح في البراديز ولا الاميرات ولا الشيراتون ونجيب سعد الصغير يحنطرنا,ومش لازم نقصي شهر العسل في مارينا زي الناس الهاي كلاس
يا عمي قضيها دي الناس لبعضيها,انت مسمعتش عن الأزمة الاقتصادية العالمية,ده الدنيا بايظة والعالم كلوا مقضيها فول وفلافل اليومين دول,ده انا حتي سمعت ان الأمريكان بيشحتوا,يعني يا عمي تخيل الواد الأمريكاني ابو شعر اصفر وعيون زرقا وبنطلون ديزل ماشي بيشحت,اومال احنا بقي عاملين ازاي
علي فكرة زمان الجواز كان زي الفل والحياة كانت موز موز موز.كان الجواز حتي كان حاجه مقدسه وسترة للشاب والبنت ,يعني لما كان حد زي حالاتي كده زمان يتقدم للبنت يقوم ابوها يدور علي أخلاقوا وشجاعته وبطولاته,مش يدور علي عدد الكريديت كارد الي في محفظته,وبعدين يا عمي هو انت لما اتخرجت اتجوزت كده علي طول ولا تعبت و نحت في الصخر عشان تعملك طريحه حلوة تتجوز بيها,ده حتي علي ايامكوا كانت الحاجات رخيصه والحياة كانت موز موز موز,انما احنا بقي ربنا يكون في عوننا عايشين في زمن كل حاجه فيه بتغلي واحنا بس الي بنرخص,دلوقتي الشاب مننا يتخرج يروح ياخد مكانوا في طابور العاطلين لحد ما ربنا يكرمه بشغلانه يحوشلوا منها قرشين يدوبك يكفوا هدايا خطيبته من دباديب و برفانات وعزومات وخلافه من الحبشتكات دي,ولو ربنا كرم عليه وعرف يحوش شويه حلوين يجيب شقة ايجار جديد
ايه يا عمي مالك كشرت كده ليه.وماله لما نقعد في ايجار هو يعني لازم تبقي الشقة تمليك,مهو ممكن نقعد في الايجار لحد ما ربنا يكرمنا و3 سنين ولا حاجه ونجيب شقة تمليك.اه ممكن والله يا عمي بس عمو أحمد عز يشفق علينا ويبطل احتكار الحديد يمكن الشقق ترخص والحياة تبقي موز موز موز
ماشي يا عمي انا حسيبك تفكر بقي كده مع نفسك و تدورها في دماغك,وياريت تبقي تسمع النشرة الاقتصاديهه بتاعت الساعه 9 ,وبعد ازنك بقي انا حختفي قبل ما حماتي تشرف وتمارس دورها الطبيعي في احباط محاولاتي المتكررة في الجواز.
يا جماعة ده مثال كتبتوا عشان اوضح اللي بيحصل مع اغلبية الشباب اللي عايزين يتجوزوا علي سنة الله ورسوله في وقتنا ده واكيد فيه شباب ربنا كارمها وقادرة تجيب كل طلبات الجواز بس للاسف الاغلبية زي صاحبنا ده وكمان مش كل الأهل بيبالغوا في طلباتهم في أهل متفهمين كتير بس برده الأغلبية زي عم صاحبنا
في الأخر عايز أقول حديث للرسول صلي الله عليه وسلم اللي قال(أقلهمن مهرا,أكثرهن بركة)
ياريت كل حد يكتب رايه يمكن نوصل لحل ونعرف نجوز صاحبنا ده و نتجوز احنا كمان
ورنا يهدي أهل البنات قولوا امييييييين
