حد يعلمني أمسك أي هباب .. خالد الصاوي

حد يعلمني الكاتيوشا


حد يعلمني أمسك أي هباب


عايز اتطوع.. واتنيل اموت


أخلص من عالم ظالم


واهه أبقى شهيد


وعيالي ماتعيشي كلاب


حد يعلمني الكاتيوشا


حد يعلمني أمسك أي هباب





حد يعلمني القسوة شوية


مش حلو اتهان واتبهدل كل شوية


إيه؟؟


شايفينّي شوية؟؟


ولا عشان ما انا طيب يعني أسفّ تراب


يا كلاب؟؟


حد يعلمني الكاتيوشا


حد يعلمني أمسك أي هباب





طيب حد يعلمني اللي اسمه إيه


الآر بي جيه


ألبد واترصد للميركافا


واسكعها.. طراااخ


تتفجّر.. هييييه


والله ده منظر يسوى ألف جنيه


تدي الدبابة بالقبقاب


حد يعلمني أمسك حاجة


أمسك أي هباب





حد يعلمني طيب أمسك رشاش


وانا اوري العالم –طيب- إن المصري طيب آه


لكن.. قشاش


وانه مايرضاش بالظلم في غزة


ولا عمره يحب الا الطيب


ولا يقدر ينسى القدس أساساً


ولا عمره يسيبها لناس.. ملهاش في الطيب


وانه بيحلم بجنوب لبنان


أول من فتق الميركافا


يقبرني والله شو طيب


وانه بيعشقها من فترة ومن غير ما يشوفها


واقصد بغداد


حد يعلمني وانا اوريكم طيب ليه إسمي


خيرُ الأجناد


مع إني أساساً يااخوانّا


راجل طيب





- خالد الصاوى -