تررررن تررررررن
انا : الو نهله : سلامو عليكم ازيك يا وليد
انا (غير مصدق اذنى):ازيك يا نهله بيقولولى انك موتى وانا ماصدقتش فقلت اتصل بيكى
نهله( بابتسامتها المعهوده ): لا يا وليد انا لسه عايشه قصدك يعنى عشان الجنازه والدفن وكده
دا مش موت دا غياب عنكوا بس (ثم تضحك) بشوف غلاوتى عندكوا
انا: انتى عارفه يابنتى انتى غاليه عندنا قد ايه بس ماكنش له لازمه الغياب
نهله: بصراحه يا وليد انا تعبت من اختلافاتكم و انشقاقتكم فقلت ابعد احسن
انا: يابنتى هى دى طبيعة الدنيا فيها دايما اختلافات
نهله:لا بس انتوا خلافاتكم ضيعت الحاجه الحلوه اللى احنا عملناها
فاكر لما قولتلك انا خايفه مجهودنا كله يضيع
انا: فاكر بس ان شاء الله مش هايضيع احنا بنحاول نلم بعض تانى وهانكمل
نهله :ياريت ترجعوا تتلموا من جديد عشان حلمنا ما يضيعش كملوا اللى احنا بدأنا فيه
عشان نشوف بلدنا احسن بلد ف الدنيا
انا: ان شاء الله المهم انتى عامله ايه دلوقتى
نهله: يااااااااااه الحمد لله انا فى مكان جميل جدا نفسى كلكوا تكونوا معايا
مكان كله شجر وطيور وعصافير عارف انا مين قاعد جنبى دلوقتى؟
انا:مين؟
نهله:خالدسعيد وسيد بلال و كريم بنونه ومصطفى الصاوى
اول ماجيت قعدوا يسألونى عنكوا وعن اخباركوا وزعلوا اوى لما عرفوا انكم اختلفتوا واتفرقتوا
انا: ان شاء الله نرجع مره تانيه نبقى واحد ونحقق حلمنا كلنا
نهله : ان شاء الله سلملى على كل الشباب وقلهم مايزعلوش عليا
ولازم يكملوا
اسيببك بقى دلوقتى سلامو عليكو
الخط اتقفل
دى مكالمه حسيت انى لو كلمت نهله دلوقتى هتبقى كده
الله يرحمك يا نهله
دي نوت من الفيس واحد من زمايلها كاتبها
الله يرحمك يانهلة
ويرحم خالد وبلال وكل الشهداء
وحسبى الله ونعم الوكيل
