ازيكو يا شباب أخباركم ايه؟
تعالو هنتكلم النهاردة فى موضوع حلو قوى بس ارجوك اقرأ للآخر وماتزهقش
واوعدك هتلاقية كلة كلام منطقى وهيبسطك قوى بس اقرا للآخر ..تمام؟
طبعا كلنا ملاحظين حال البلد التعبان وقلة الشغل وارتفاع البطالة وقلة الجواز والحوارات دى وكدة وكلة زهق وجالة احباط ونفسنا نسافر برة ونسيب البلد دى وبنحلم بحياة افضل وكل كل دة اللى احنا عارفينة
لغاية كدة حلو قوى..ماشى طب اية الحل هقولك على شوية حاجات بناء على تجربة عملية
أولها انك تسال نفسك شوية الاسئلة دى لنفسك واهم حاجة تخليك واقعى وصريح لان 50 % من حل المشكلة هيا الاعتراف بيها
نبدأ ؟؟؟؟؟
دلوقتى فية خالق للكون قبل مايبقى ريس للدولة ورزقى مكتوب عندة امال فية بقى ياجدعان؟
هقولك ياسيد الناس اولا علشان نبقى واقعيين لازن نعرف كلنا اننا بنستسهل وماحدش عاوز يتعب ولا يبدأ من الاول ونفسك تتحط فى شغلانة تانى يوم بكرة الصبح ب مليون جنية وبعد بكرة تكون متجوز البنت اللى بتحبها فى الجامعة او شوفتها او خلافة
وكل ماحد يكلمك تقولة اصل البلد بنت ستين فسبعين اصل مش عارف اية ..ماشى حو حلو اسمع منى بقى
دلوقتى لو انا قولتلك تعالى اشتغل شغلانة مثلا مثلا ب 300 جنية هتوافق؟
أرد انا بالنيابة عنك واقول يعنى انا يتصرف عليا دم القلب واقعد اذاكر واتفحت واطلع اشتغللى شغلانة ب 300 جنية؟ هرد عليك واقولك هو انت عملت حاجة اصلا او دورت على فرصة احسن؟ ياعم فين كورساتك فين خبراتك فين السى فيهات اللى بتترمى هنا وهنا فين التحمل النفسى لضغوط الشغل ..ياراجل دة انت لو اشتغلت عند واحد وصاحب الشغل وقالك هاتلى كذا او كذا بتضايق وتتخنق وتقعد تنفخ...طب انت جربت تنزل تشتغل حاجة فى الاجازة؟؟ احتكيت بسوق العمل؟ عرفت تروح وتيجى وتسافر هنا وهنا؟ اضحك عليك وحصلك دروبات فى الشغل واتضحك عليك والكلام دة..بصراحة احنا خايفين نخش تجربة لاول مرة وعاوزين اللى احنا عارفينة ومش عاوزين نجرب اى حاجة جديدة وخايفين لنفشل
ماشى طب آدام الكلام دة كلة مظبوط طب اية اللى بيجيبلنا الاحباط والكآبة ادام انا هشتغل والاقى؟؟
بص ياعم الحاج كل اللى بيحصل ان واحد فاضى زي بيقعد مع واحد فاضى زيك ونقعد نشتغل بعض ونقول مشاكل البلد وانا شفت فلان اتعمل فية ومالاقاش والناس اللى ماتت فى العبارة وكل يوم اتفرج على القاهرة اليوم والعاشرة مساء والجرانين مليانة مشاكل واحكيلك وتحكيلى واتلم المتعوس على خايب الرجا..ولا انا ولا انت فاهمين اى حاجة فى اى بتنجان
طب بذمتك جربت تسأل واحد اكبر منك او ناجح هو بقى كدة ازاى وتستفاد من خبراتة؟
انت لو قعدت مع واحد ناجح او اكبر منك وعندة خبرة هيقولك بص ياابن الحلال انت المفروض تعمل كذا وكذا وتروح هنا وتيجى هنا وانت لسة بدرى عقبال ماتوصل ولازم تتعب ولازم تصبر وكلام يمكن لاول مرة هتسمعة فى حياتك
طيب افرض اشتغلت وتعبت وعملت كل اللى بتقول علية وفى الآخر فشلت؟؟
طيب لو كل واحد قال لنفسة انا يمكن اتعب وافشل كان كلة قعد فى بيتة ..طب مش يمكن تنجح بص مش هتعرف اذا كنت هتنجح ولا هتفشل الا لما تجرب ولو فشلت اكيد هتطلع منها بحاجة او هتتعلم حاجة حط فى اعتبارك انك فى الحالتين كسبان ..هو انت لو فية بت على الشات قالتلك تعالى قابلنى وانت بينك وبين نفسك عمال تقول انا خايف انزل اشوفها لتطلع اشتغالة هتفضل عمال تفكر ولو مانزلتش شوفتها ولما شوفت صورتها طلعت حلوة مثلا هتقول ياااااااااة ياريتنى كنت نزلت قابلتها صح ولا لا؟؟ هههههههههه اهو تجارب الحياة كدة برضة انزل وجرب وشوف
طيب هل اللى انت بتقولة دة هو السبب اننا مش عاوزين نتعب وكدة ولا فية اسباب تانية؟؟
طبعا الحكومة ليها دور ودور كبير كمان بس وضع واتحطيت فية وهيا الظروف كدة احط ايدى على خدى بقى وخلاص الدنيا خربت؟؟ ولا انزل اتعب واحاول؟ وخد بالك بص هتتبهدل وهتتخنق فى اول الشغل وهتتهزهق بمزاجك او غصب عنك شوف الحكميتن دول
الضربة اللى ماتموتش تقوى/اذا لم تتعلم صعود الجبال ستعيش دوما بين الجحور/كثرة السقوط تعلم الوقوف
ياعم اللى بيحصلنا دة عادى والله بس المشكلة اننا ماسكين ودان بعض ورغى رغى ولا حد فكر يطبق وعارفين كلام القرآن وبس ومش بنعمل بية
طب اقولك حاجة حلوة مش هتصدقها ؟؟؟
الامريكان بيدرسوا القرآان والتعاليم الاسلامية حتة حتة وبيطبقوة كلة الا حاجة واحدة بس العبادة؟ فية كتاب امريكى اسمة " اكتشف الدين والمجتمع الاسلامى " واللى مش مصدق عندى الكتاب دة للى عاوزة بيتكلم عن مواضيع الاخد بالاسباب والمشقة والتحمل والخطط الحربية والسياسات والاقتصاد بياخدوا كل حاجة وبييجى عند الصلاة والكلام دة وستوووووب ..علشان كدة تلاقى الامريكى شيك وجينتيل ومحترم ولبق فى الكلام وابن ناس كدة...ماهو دة اصل المسلم ياعم الكوتوفوتو ..بس انت مش عارف دينك يامعلم أو فاهمة غلط ياما ماشى ورا شيخ واللى بيقولة تنفذ من غير حتى ماتشغل عقلك لو بيقول غلط امشى وراة
** بس احنا مش بنقلد الغرب الا فى الموضة والهيافة وبس **
طب عارف اية هيا فكرة تسقيطة البناطيل الجينز؟؟ أو جت منين ؟
طبعا فية تفرقة عنصرية والكلام دة بين البيض والسود ففية مناطق اللى فيها السود والزنوج اللى هما ( النيجرز) دول فيهم عصابات وكلام من دة فلما الشرطة الامريكية كانت بتمسك حد من العصابات دى ويدخلوهم السجون كانوا بيجردوهم من أى حاجة يقدر يأذى بيها الشرطى فكانوا بيقلعوهم الاحزمة فكان البنطلون بيسقط وبيمشى بية وبيقضى مدة الحجز بية كدة .. دة الوسيلة اللى اتنقل بيها فكرة تسقيطة البنطلون الجينز ياكتاكيت..أما بالنسبة الجينز اتعمل لية اصلا؟؟ المواطن الامريكى لما كان بيشتغل كان فية هدوم شغل وهدوم خروج فكان بياخد منة وقت وبيعطل الشغل فاخترعوا الجينز بحيث انة يبقى لبس الخروج هو نفسة لبس الشغل علشان مايضيعش وقت واقسم بالله الكلام دة حقيقى واللى لية حد برة وفاهم يسالة
طب اية الاسباب التانية اللى مخليانا عاملين كدة؟
سببين كمان غير اللى شوفتهم فوق ..اية هما؟
بص اتذكر صفتين عن البنى آدم فى القرآن
" عجولا" يعنى مستعجل دايما وبيتعجل النتايج ومش صبور
" كفارا" قليل الشكر ودايما من اقل حاجة بيغصب على ربنا
المهم تانى سبب ودة الاهم ان كل واحد فينا نفسة يحب ويتحب ولما بيلاقى البنت المناسبة وبيدا يطبق فعلا فيواجهة مشاكل الحياة ويحس انة ضعيف ومش قادر يعمل حاجة وبالتالى البنت هتستحملة لفترة معينة ولما تلاقيه مش قادر يعمل حاجة بتسيبه يرجع يقولك البنات خاينين وبياعين والبلد بنت ستين وسبعين ويعقد نفسة
**هقولك على وصفة سحرية**
أولا خليك مقتنع ان الجواز (مقومات) مش (سن ) ياما ناس عندها 30 سنة ولسة عيال هيا موضوع مقومات ولا لة أى علاقة بالسن فية ناس قدى ومتجوزين ورجالة طب اية هيا المقومات دى؟؟انك تكون راجل قد المسئولية-واد بتفوت فى ال
-بتعرف تتصرف-شغال شغلانة تقدر اقلها تصرف بيها على اللى معاك-تقدر تشيل هم نفسك علشان تقدر تشيل هم واحدة معاك ل
و عرفت تحقق دول تتجوز لو عندك 9 سنين
-----------------------------------------------
طب هسألك سؤال هتعرف قد اية وماتزعلش منى انك عيل ؟
مثلا خطيبتك وانت واقفين فى موقف ومروحين والمواصلات زحمة موت والناس بتتخانق علشان تركب وهيا معاك هتعمل اية؟
----------------------------------
انت ومراتك مسافرين اسكندرية وعاوزين تقضوا يومين حلوين ..تعرف تنزل اسكندرية لوحدك من غير اصحابك؟ وهتقعد فين؟ وياترى هتعرف تلاقى شقة؟؟
----------------------------------
خطيبتك وانت بتتشموا وفية عيال بتعاكس او بترمى كلام..هتتصرف ازاى وامتى تتخانق؟ وهل هتتخانق وهيا معاك؟ طب ولو اضربت مثلا موقفها هيبقى اية؟؟
----------------------------------
تعرف تفصل مابين مشاكلك فى الشغل ومشاكل البيت؟ وهل هتبقى فترة الخطوبة ياروحى وقلبى ولما تتجوز هتبقى زى الحنطور واقل مشكلة بتتنرفز عليها؟؟
** كفاية كدة احسن تحس انك طفل..ولما تعرف تحل دول ابقى قوللى ههههههه**
ولو عاوز تبقى راجل طبق فى بيتك قبل ماتطبق برة..اتخيل نفسك لوحدك فى البيت والحجة (والدتك) معاك وحصل طارىء هتعمل اية ؟ خلى معاملتك حلوة مع والدتك اتدرب على معاملة ابنك على ابن اخوك اكتسب خبراتك من الوسط اللى حواليك قبل ماتدور علية برة فى شريكة حياتك
الحل انك تبقى راجل وتتعب وتحاول وتصبر وتشوف البنت دى تستاهل منك اية وتعملة وان الله لا يضيع اجر من احسن عملا وتسيبك من حوارات ميمى وتوتى وتامر حسنى انت مش هتعيش حياتك على الكنبة الوردية الحياة مليانة مشاكل والحب ماهوش بس كلام بين اتنين اتقابلوا
أنا عارف ان الواحد لما بيسمع الكلام دة بيسخن ويتشجع ويقول هعمل وهعمل واعمل وبمجرد مايبدا او يعدى يومين بيهمد تانى ...الحل انك كل ماتهمد تقرى التوبيك دة
كفاية كدة ياجماعة أحسن تقولوا عليا فيلسوف الكلام دة ياجماعة وبتكلم بناء عن تجربتى وانا فعلا بطبقة الحمدلله ومش حاسس باى مشاكل اعتقد لو البلد ولعت مش هحس برضة ههههههههه
الموضوع دة مش من كتابتى ولكنى قريتة فى مكان وعجبنى
ياريت بقى كلنا لو مفيش شغل بالف جنيه
نقبل بالاقل
ونسيبنا من المنظرة وحلم الوظيفة البرستيج
