والباشا بيشتغل ايه ؟؟ .. رقاصة ّ!!

مازلت غير مصدق اللي شوفته في برنامج الحقيقة ..

كان بيعرض موضوع الرجال اللي بيمتهنوا الرقص الشرقي ..

يعني من الآخر بيشتغلوا رقاصة ..

بس زي ماقال ميرو .. أنا برقص برجولة ..

وكانو جايبين قصاده واحد أنا مش عارف هو بيشتغل ايه لأني مالحقتش البرنامج من الأول ..

بس الراجل كان قاعد هيتجنن حقيقي ..

والمستفز في الموضوع ان ميرو مش شايف أي غلط في اللي هو بيعمله ولاقيله مليوووون مبرر ..

أنا مش برقص علشان المادة .. أنا برقص لأني موهوب ..

والراجل يقوله انت شايف انك راجل .. ازاي بتتعامل مع الناس ..؟؟

يقول أنا في المجتمع حاجة .. وعلى ال stage .. حاجة تانية ..

وعرضوله فيديو وهو بيرقص على واحدة ونص بجانب بنتين ..

بس كان قايم بالواجب بصراحة .. والله يضربهم بتلتوميت جزمة ..

ويقول بكل بجاحة .. أنا بعمل حاجة .. ماحدش يعرف ينافسني فيها ..

قاله ستات ولا رجالة ..

رد .. الإتنين ..

الراجل فضل يقول .. في سور بين الأنوثة والرجولة .. لما يتهد .. يبقى المجتمع بقى صلصة ..

لما المجتمع ينتج أفراد بالشكل ده .. يبقى فين النهضة اللي هيعملوها وفين العلم ..

لما العوالم يبقوا أكتر من العلماء .. لأ .. ومن الجنسين ..

يبقى وعلى الأرض السلام ..

وقال الرجالة اللي من النوع ده .. وكأنهم بيعلنوا للملأ .. انهم شواذ

وفي النهاية قاله هسألك سؤال كده عشان نطري القعدة .. ولو انك مطريها على الأخر ..

مين مثلك الأعلى ياميرو .. سامية جمال ولا تحية كاريوكا ولا نعيمة عاكف ..

راح ميرو قايل .. كل واحدة ليها منطقة حلوة فيها ..

قاله ياحلاوتك ..

ومن ضمن ماقال ميرو .. ان هو بيرقص باحترام لأنه لابس جلبية أي نعم مطرزة .. بس محتشمة .. مش مبينة حاجة ..

لا ماتبين ياسي ميرو عشان تبقى كملت ..

والمشكلة انه مش واحد .. ده أكتر من واحد .. في البرنامج بس ذكروا أربعة ..

لأ وميرو ده متجوز على فكره ومخلف كمان ..

ويقولوله المجتمع رافضك ..

يقولهم مش رافضني .. بس مابيحبوش يشوفوا واحد بيرقص ..

وفي النهاية قال .. أنا بحب أرقص ومابعملش حاجة مخلة بالآداب ..